Ku wa gatanu tariki ya 4 Mata 2025, i Kabgayi mu Kigo cya Caritas giteza imbere Ubuhinzi n’Ubworozi byita ku kurengera Ibidukikije(CEFOPPAK) habereye inama y’Inteko rusange ya Caritas ya Diyosezi ya Kabgayi.
Iyo nama yari iyobowe n’Ubuyobozi bwa Caritas ya Diyosezi ya Kabgayi ikaba yitabiriwe n’abafatanyabikorwa ba Caritas ya Diyosezi ya Kabgayi barimo Uturere ikoreramo, abashinzwe Komite za Caritas mu maparuwasi yose agize Diyosezi ya Kabgayi, abahagarariye Imiryango-nterankunga ikorana na Caritas ya Kabgayi ndetse n’abakozi ba Caritas.

1. ESE CARITAS YAJE ITE ?
Caritas yavutse mu w’1959 iturutse ku gitekerezo cy’Umwepiskopi wa Kabgayi, itangira yitwa Secours Catholique Rwandais. Caritas yaje mu gihe mu Rwanda hari ubwicanyi bwibasiye Abatutsi. Icyo gihe yari igamije kurengera abavanywe mu byabo, abasenyewe ndetse n’abameneshwaga. Kuva mu w’1973 kugeza mu w’1975, muri diyosezi zose havutse Urwego rwa Caritas. Uru rwego rwakomeje kugaba amashami no gushinga imizi ku buro ubu Caritas ikorera muri Paruwasi zose z’igihugu cy’u Rwanda, ikagira inzego zubatse neza kuva ku Muryango-remezo kugeza ku rwego rw’igihugu.

2. IBIKORWA BYA CARITAS YA DIYOSEZI YA KABGAYI

Kuva Caritas ya Diyosezi ya Kabgayi yatangira yakomeje kwibanda cyane cyane ku bikorwa bigamije kwita ku iterambere n’imibereho myiza ya muntu. Mu bikorwa byayo binyuranye harimo ko :
1.Caritas ya Diyosezi ya Kabgayi ifasha abakene ibaha ibintu binyuranye byaba ibyo kurya n’imyambaro,
2. Caritas yakoze imiyoboro y’amazi hagamijwe ko abantu bagira ubuzima buzira umuze,
3. Caritas yabumbiye hamwe abageze mu zabukuru hagamijwe kubakura mu bwigunge,
4. Caritas yashyizeho amarerero y’abana bato,
5. Caritas yashyizeho amatsinda y’abafite ubumuga guhera muri 2016. Nka Paruwasi ya Cyeza honyine hari abasaga 120 bari muri ayo matsinda,
6. Caritas ya Diyosezi ya Kabgayi kandi yashinze Ikigo cy’Urubyiruko gishinzwe guteza imbere Ubuhinzi n’Ubworozi bikorwa hibandwa ku kutengera ibidukikije(CEFOPPAK),
7. Caritas ya Diyosezi ya Kabgayi yita ku banyeshuri badafite ubushobozi ibaha ibikoresho by’ishuri kandi ikanabishyurira amafaranga y’ishuri(school fees).
Caritas ya Diyosezi ya Kabgayi kandi ifite n’ibindi bikorwa bitabarika cyane cyane nko gutoza abantu kugira umutima w’urukundo n’ubutabazi.

3. CARITAS YA DIYOSEZI YA KABGAYI N’ABAFATANYABIKORWA

BAKUNDUKIZE Pampile, Umuhuzabikorwa wa Caritas ya Diyosezi ya Kabgayi, yagaragaje ko Caritas ya Diyosezi ya Kabgayi ifatanya n’inzego zinyuranye z’igihugu mu kwita ku iterambere n’imibereho myiza ya muntu. Mu bikorwa bakora harimo kwita ku bigo-nderabuzima, uburezi cyane cyane ku bibyanye no kwita ku bafite ubumuga, gushyigikira VUP, gahunda ya Girinka, gufasha abaturage kwiteza imbere n’ibindi.

4. KUNGURANA IBITEKEREZO

1. Bwana MBABAZI François-Xavier, Perezida wa Komite ya Caritas ya Diyosezi ya Kabgayi yibanze kugushimira. Yashimiye abakorerabushake ba Caritas, Komite za Caritas ziri hirya no hino mu maparuwasi, ba Padiri Omoniye ba Caritas muri paruwasi zose za Diyosezi ya Kabgayi ndetse n’abafatanyabikorwa bose mu iterambere rya Caritas ya Diyosezi ya Kabgayi.

Perezida wa Komite ya Caritas kandi yashimiye umusaruro wabonetse mu Kwezi kw’Urukundo n’Impuhwe. Yagaragaje ko mu mwaka wa 2023 hari habonetse Frw 5.501.165 ariko mu mwaka wa 2024 hakaba harabonetse Frw 16.608.098. Yatangaje ko Caritas ya Diyosezi ya Kabgayi yiyemeje gufata ingamba z’ubukangurambaga mu nzego zose, mu byiciro byose no mu madini yose ; mu mashuri, mu Miryango-remezo, mu bikorera n’ahandi kuko urukundo rutagira umupaka. Yashoje ashimira Paruwasi ya Kabugondo, Paruwasi ya Kabugondo yashimiwe ihabwa inyana naho Paruwasi ya Gihara yatanze Frw 2.498.433 mu Kwezi kw’Urukundo n’Impuhwe ihabwa amabati 32.

2. Sr Gaudiose NYIRANEZA waje ahagarariye Umunyamabanga Mukuru wa Caritas Rwanda, yashimiye imikorere n’imikoranire ya Caritas ya Diyosezi ya Kabgayi cyane cyane mu guhanga udushya nko kuba Diyosezi ya Kabgayi yarashyizeho Komisiyo ishinzwe kwita ku bafite ubumuga no kuba yarashyizeho Ikigo giteza imbere Ubuhinzi n’Ubworozi nka CEFOPPAK.

3. Umuyobozi w’Akarere ka Kamonyi Wungirije ushinzwe Ubukungu yashimiye Diyosezi ya Kabgayi uko yibanda ku guteza umunyarwanda imbere kandi itarobanuye. Yavuze ko yishimiye ko Paruwasi 2 zashimiwe zose ari izo mu Karere ka Kamonyi. Yashoje ijambo rye avuga ko Leta izakomeza gukora ibishoboka byose ngo ifatanye na Caritas, Ubukombe mu kugaragariza urukundo n’impuhwe abanyantege nke.

5. IMYANZURO Y’INTEKO RUSANGE YA CARITAS YA DIYOSEZI YA KABGAYI 2025
1. Gukora ubukangurambaga ku bikorwa by’Urukundo n’Impuhwe burenga imbibi z’abakristu gatolika bukagera ku bantu bose bafite umutima w’urukundo ;
2. Kuzamura umusaruro w’Ukwezi kw’Urukundo n’Impuhwe no gushimira buri wese wabigizemo uruhare ;
3. Gukora iteganyabikorwa ry’Ukwezi kw’Urukundo n’Impuhwe no kubitangira raporo ku gihe ;
4. Gukora ubukangurambaga mu bigo by’amashuri no gushaka igihe gikwiye cyo gukusanya inkunga y’Igikorwa cy’Urukundo n’Impuhwe mu bigo by’amashuri agize Diyosezi ya Kabgayi ;
5. Kongera imbaraga mu gukora ubukangurambaga ku budaheza abantu bafite ubumuga no guha umwanya ubushobozi bw’abafite ubumuga ;
6. Kongera imbaraga mu gukorana n’abahinzi hagamijwe kongera umusaruro ukomoka ku buhinzi n’ubworozi hitabwa ku buryo bwo guhangana n’imihindagurikire y’ibihe ;
7. Gukomeza kubyaza umusaruro amasambu ari muri za paruwasi hifashishijwe ikigo cya CEFOPPAK n’abanyeshuri bakirangizamo ;
8. Kwishakamo ubushobozi kurusha gutegereza inkunga no kwirinda gusesagura ibihari.

6. IJAMBO RYA MYR BALTHAZAR NTIVUGURUZWA, UMWEPISKOPI WA KABGAYI
Musenyeri Balthazar NTIVUGURUZWA, yashimiye abakorerabushake n’abafatanyabikorwa bose ba Caritas ya Diyosezi ya Kabgayi abasaba no gukomeza gukorana umurava, urukundo n’ubwitange mu byo bakora byose.Yatangaje ko kugira ngo abantu batere imbere bagomba guharanira kugira ubufatanye n’inzego zose hagamijwe kwishakamo ibisubizo kuko umuntu aba yifitemo imbaraga zo kwikura mu bibazo ariko akagomba kubiterwamo inkunga n’abandi.

Myr Balthazar NTIVUGURUZWA avuga ko guhanga udushya no kubyaza umusaruro ubutaka buto abanyarwanda bafite bishobora kuzamura Caritas igihe byatojwe neza urubyiruko n’abana kuko ari bo bazagira uruhare mu iterambere ry’ahazaza. Ahamya ko umuryango ugomba kugira uruhare mu gukemura amakimbirane akunze kugaragara mu ngo, asaba Caritas ya Diyosezi ya Kabgayi kwegera abafashijwe na Caritas bose na bo bakajya bagira uruhare mu gufasha abandi.

Umwepiskopi wa Kabgayi kandi yarangije asaba abayobozi b’ibigo-nderabuzima kubaka chapelle kuri buri kigo bayoboye kugira ngo ababagana babone ahantu hakwiye ho guhurira n’Imana ndetse n’abasaserdoti babone aho baturira igitambo cya Misa. Inteko rusange ya Caritas yashojwe n’umugisha w’Umwepiskopi wa Kabgayi, Nyiricyubahiro Musenyeri Balthazar NTIVUGURUZWA.

Umwanditsi w’inkuru : Padiri Jean de Dieu HAGENIMANA